ESTIMULACIÓN LINGÜÍSTICA, IMAXINACIÓN, OBSERVACIÓN, ATENCIÓN E PERCEPCIÓN.

Escolle para levar a cabo a proposta que che interese:

PROPOSTA 1: QUE ESTÁ PASANDO?

Imaxes de absurdos que nos permiten traballar a observación, a imaxinación e a expresión oral. Podemos pedirlle varias cuestións(de unha en unha e por orde de dificultade). Que nos conte o que está vendo. Que comente que é o que pasa na imaxe que está a ver. Que explique por que ou como debería ser segundo o seu criterio. Que observe algún aspecto/elemento/obxecto concreto da imaxe. Que busque un elemento/obxecto concreto na imaxe....É fundamental que intente expresarse, empregando o vocabulario do que dispón, facendo definicións e frases completas. Por exemplo, si lle preguntamos cunha imaxe diante: "Onde está o rato?", e si responde: "Aquí", sinalando co dedo ao rato, hai que insistirlle: "Pero aquí, onde?, explícame", para que sexa capaz de definir o que ve, por exemplo, "pois está debaixo da mesa" ,e insistimos máis: "e que está facendo?". Para que explique: "Está comendo o queixo", e podemos seguir preguntándolle... "E como é?"; "De que cor?"; "Grande ou pequeno?".

Ao se tratar de imaxes de absurdos, xogaremos a buscar o que se corresponde e o que non se corresponde co contexto. Cousas que normalmente non atopamos nese contexto ou accións que non realizamos do xeito no que se ve na imaxe... E podemos ir máis alá, formulando hipóteses aos nenos/as de situacións imaxinarias a partir da imaxe: "Que pasaría si..."

Non é aconsellable traballar máis de dúas imaxes nunha sesión. Preme para escoller as imaxes:
Rogamos, por favor, non se modifiquen, nin se eliminen nin engadan contidos nestas carpetas do Drive. Será revisado. Grazas.

FOTOS ABSURDAS

DEBUXOS ABSURDOS

                                 

PROPOSTA 2: QUE ESTÁ SOANDO?

Sons de animais, cos que podemos traballar do seguinte xeito: primeiro presentamos o son sen a imaxe, para que a crianza adiviñe de que animal se trata. Despois podemos poñer a imaxe sen son, para que a crianza reproduza a onomatopea ou son que emite o animal que está a ver. Finalmente podemos facer o mesmo, pero con máis dun animal, para que recorde o que viu e reproduza os sons, ou pola contra, que dunha vez escoite varios sons sen ver as imaxes, e sexa capaz dicir en orde, os animais correspondentes aos sons que escoitou.

Podemos repetir o mesmo tipo de xogo cos seguintes sons:

MEDIOS DE TRANSPORTE

INSTRUMENTOS DE MÚSICA

PROPOSTA 3: CONTOS PARA A ESTIMULACIÓN LINGÜÍSTICA

Contos para traballar o fonema /s/, o fonema /l/ e o fonema /f/. Traballar un só conto por sesión. Narración sen imaxes, poñendo énfases nos sons dos fonemas que queremos que repitan. Preme nas seguintes imaxes para ver máis grande.

A GATA FUFI

A SERPE SISI

A LINGUA LOLA

Despois de contarlle os contos, podemos pedirlle que nos axuden a contalo eles/as, dándolle a oportunidade que reproduzan por si mesmos/as os sons dos fonemas que estamos a traballar. Tamén podemos pedirlle que debuxen nun folio, aos protagonistas do conto que acaban de escoitar. E finalmente buscar pola casa obxectos/elementos/xoguetes que conteñan no seu nome os fonemas traballados. Ou dicir cousas que empecen por... Etc.

Grazas á mestra Vanesa de AL que nos proporcionou recursos.

Lembrade que todas as propostas son suxestións opcionais e voluntarias.